بأمر الملك 

بامر الملك عوّدت سمعٍ وطاعه

وفَل الشّعر في بحر عمري شراعه

يسوقه الواجب ويمليه موقف

ويلهَجْ به لساني ويكتب يراعه 

وشلون ما البّي وسلمان عمّي 

وعندي من الفيصل بقلبي وداعه 

أوصاني بْطاعة عمامي ووفّيت 

حملتها بالعمر وعْد وقناعه 

وارسلت دَعْواتي لعَاتِب قصيدي 

الشعر واغراضه وباقي الجماعه 

الحرف والمعنى والاوزان والقاف 

وتسابقوني ما لزَمهم شفاعه 

الشعر فكر انسان وابداع حادي 

عذب الكلام بدون غث وصناعه 

والشعر سلطان الكلام وبلاغه 

والشعر ماهَز المشاعر سماعه 

وحُورَبْت للعرضه على باب سلمان 

وسَلْ الشّعِرْ سيفَ المعزّه شجاعه 

سلمان لو يامِرْ على الروّح تفداه 

عمّي مكان ابوي أقبّل ذراعه

خالد الفيصل

الحُلْم

شاخَتْ بيَ الأيام والحُلْم توّهْ 

كل ما توارتْ جَذْوته شبّ ضوّهْ 

وان ثوّرتْ عجّةْ زماني مطَرْني 

واذا ادْلهمّ اللّيل يقْدحْ بنوّهْ 

حلْمي أشوف بْلادي أنموذج وْرمْز

يشعّ بالقرآن هَدْي وْنبوّهْ 

للمعرفه مركز وللدّين فَـتْوَى 

وبْراية التّوحيد للحقّ قوّهْ 

وللفكر والتّنوير مصدر ومَلْفَى 

فَرحة صديق الدار، حَسرة عدوّهْ 

حلمي كبيرٍ لكن آمالي أكْبر

فينا حكيم الرّاي وفينا فُـتوّهْ

واليوم يوم الله عطانا بفضله

أمن وْأمان وعدل شرْعٍ تفوّهْ

وجاد الزّمان وفرْصة العمر تاحَتْ

وصفا لنا من والي العرش جوّهْ

وشْ عذرنا لو ما رقينا الصّداره

وداعي الفلاح بعالي الصّوت دوّهْ 

ياسعودي الهمّات هذا زمانكْ 

اِنْهضْ وماسوّوه الأجْدادْ سوّهْ 

خالد الفيصل